М.Х. Дулати атындағы Тараз университетінің студенттері Гүлжанат Қобыланды мен Мәдина Мұрат Үндістанда шотокан каратэ-додан өткен әлем чемпионатында алтын медаль жеңіп алды. Қос спортшы да өз санаттарында үздік шығып, Қазақстан құрамасының қоржынына екі алтын салды.
Жарыс 30 қазан мен 1 қараша аралығында Бангалор қаласында өтті. Додаға барлық жас санатындағы спортшылар қатысты.
Жеңімпаз қыздар «Білім беру саласындағы дене шынықтыру-спорттық қызмет» (6В01421) білім беру бағдарламасының екінші курсында оқиды. Олар оқу мен тұрақты жаттығуды қатар алып жүр.
– Әлем чемпионатына қатысу бізге үлкен жауапкершілік жүктеді. Дайындық барысында техникалық шеберлік пен физикалық бабымызды шыңдауға ерекше көңіл бөлдік. Бұл жеңіс – үздіксіз жаттығу мен бапкерлеріміздің қолдауының жемісі. Алдағы уақытта да халықаралық ареналарда бақ сынап, ел спортының дамуына үлес қоса бермекпіз, – деді әлем чемпионы Мәдина Мұрат.