Жол-көлік оқиғасы 2 қараша күні таңертең Өскемен қаласындағы Назарбаев даңғылында болды. Бұл туралы Шығыс Қазақстан облыстық полиция департаментінен хабарлап отыр.
Белгілі болғандай, Mitsubishi Lancer автокөлігінің жүргізушісі бұрылған кезде рөлге ие бола алмай қалып, көлік бағанаға соғылған.
— Абырой болғанда жол апаты салдарынан ешкім зардап шекпеді. Материалдық шығын да келтірілген жоқ, – деп хабарлады ведомство өкілдері.
Аталған дерек бойынша жүргізушіге қатысты әкімшілік хаттама толтырылды. Осы ретте, тәртіп сақшылары көлік жүргізушілеріне барынша абай болып, жол ережелерін қатаң сақтауға шақырды.