Өскеменде балабақшаға ваучер беру басталды

Өскеменде бүгіннен бастап мектепке дейінгі ұйымдардан орын күтіп жүрген балалардың ата-аналарына балабақшаға жолдама беруге арналған цифрлық ваучерлер таратыла бастады. Құжатты растау және баланы балабақшаға қабылдау рәсімін аяқтау үшін белгіленген мерзімді сақтау қажет.
Қалалық білім бөлімінің мәліметінше, ваучерлер balabaqsha.snation.kz порталы арқылы рәсімделеді. Осыған байланысты ата-аналарға ваучердің қолданылу мерзімін өткізіп алмау үшін жеке кабинетін және SMS-хабарламаларды тұрақты түрде тексеріп отыру қажет.
– Ваучер берілгеннен кейін оны алған ата-анада құжатты растауға немесе одан бас тартуға екі жұмыс күні беріледі. Ваучер расталғаннан кейін бес жұмыс күні бойы жарамды болады. Осы уақыт ішінде баланы балабақшаға қабылдау рәсімін толық аяқтап, мектепке дейінгі ұйыммен электронды келісімшартқа қол қою қажет, – делінген ақпаратта.
Егер ата-аналар құжаттарды уақтылы рәсімдеп үлгермесе, ваучердің қолданылу мерзімінің соңғы күні оны жеке кабинет арқылы бір рет қосымша екі жұмыс күніне ұзартуға болады.
Қабылдау рәсімін аяқтау үшін ата-ананың немесе заңды өкілдің электрондық цифрлық қолтаңбасы, баланың туу туралы куәлігі, заңды өкілдің жеке куәлігі, №027/у медициналық анықтамасы, №052-2/у формасындағы баланың денсаулық паспорты және №065/у формасындағы профилактикалық екпелер картасы қажет.