Шығыс Қазақстан облысында Күршім мен Самар аудандарын жалғайтын Бұқтырма су қоймасындағы көпір ашылғаннан кейінгі алғашқы 24 сағат ішінде одан бір жарым мыңнан астам көлік жүріп өтті. Бұл туралы Көлік министрлігінен мәлім етті.
Көпірдегі қауіпсіздікті қамтамасыз ету үшін онда 102 камера орнатылған. Оның 62-сі үстіңгі жағында, 40-ы астынғы тұсында. Камералардағы жазбалар тікелей бақыланып отырады.
Сонымен қатар мұз қатқан кезде көпір тіректері зақымданбауы үшін учаскеде 40 мұз кескіш жұмыс істейді. Көпірдің стратегиялық маңызы бар болғандықтан оның екі жағына полиция бекеттері қойылып, тәулік бойы бақылау орнатылған. Көпірге техникалық қызмет көрсетуді бақылау үшін бейнекамераларға тұрақты қосылу мүмкіндігі бар диспетчерлік пункттер де жұмыс істейді.
Айта кетейік, көпірдің ұзындығы 1316 метрді құрайды. Ол тәулігіне 80 мың көлікті өткізе алады. Көпірге 18 шақырым жаңа жол да салынған.