Қазақстандықтар 2026 жылғы 23 тамызда өтетін Құрылтай депутаттарының сайлауында қай жерде дауыс беретінін алдын ала біле алады. GOV.KZ платформасында сайлау учаскесін іздеуге арналған онлайн-сервис жұмысын бастады.
Жаңа Конституцияға сәйкес, Құрылтай заң шығару билігін жүзеге асыратын елдің бір палаталы жоғары өкілді органы болды. Оның құрамына біртұтас жалпыұлттық сайлау округі бойынша пропорционалды жүйе негізінде бес жыл мерзімге сайланатын 145 депутат кіреді.
Сайлаушылар саяси партияларға және олар қалыптастырған тізімдерге дауыс береді. Сайлау нәтижесі Құрылтайда қай партиялардың өкілдік алатынын және заң қабылдауға қатысатынын айқындайды. Сондықтан 23 тамыздағы дауыс беру – жай ғана формалдық емес. Азаматтар алдағы бес жылда елдің заңнамалық саясатына ықпал ететін шешімдер қабылдайтын органның құрамын таңдайды.
Қазақстан Республикасы Орталық сайлау комиссиясының хабарлауынша, сервис арқылы учаскенің нөмірі мен мекенжайын білуге болады. Ол үшін өз өңіріңізді таңдап, ЖСН енгізу қажет. Енді кабинеттерді аралап, соңғы сәтте қажетті ғимаратты іздеудің қажеті жоқ – барлық ақпарат онлайн қолжетімді.
Азаматтар үшін бірден үш платформа іске қосылды:
https://www.gov.kz/sailau?lang=kk;
https://sailau.gov.kz/kk;
https://sailau2026.gov.kz/kk.
Осы сілтемелердің кез келгеніне өтуге болады. Өңірді таңдап, ЖСН енгізгеннен кейін жүйе сайлау учаскесінің нөмірі мен мекенжайын көрсетеді.
Өз сайлау учаскеңізді eGovMobile қосымшасынан да табуға болады. Онлайн-сервис «Танымал қызметтер» бөлімінде орналасқан.
Сонымен қатар аталған сервистердің барлығы QR-кодтарды сканерлеу арқылы қолжетімді.