Өскеменде дауылдан кейін қаланың барлық тұрғын ауданында электрмен жабдықтау қалпына келтірілді. Дегенмен бригадалар саяжай алқаптарындағы апат салдарын жою, бағдаршамдар мен сыртқы жарықтандыру желілерін қалпына келтіру жұмыстарын жалғастырып жатыр.
Қала әкімдігінің мәліметінше, тұрғын үйлер мен әлеуметтік нысандардағы негізгі апаттық-қалпына келтіру жұмыстары аяқталған.
– Бұған дейін электр қуаты өшірілген барлық шағын ауданда электрмен жабдықтау толық көлемде қалпына келтірілді. Қазіргі уақытта Понтон көпірінің маңы, Самсоновка және Лесхоз кенттеріндегі электр беру желілері мен 0,4 кВ желілерінде, жер үй тұрғындарының жекелеген өтініштері бойынша жұмыстар жалғасып жатыр, – деп хабарлады әкімдіктің баспасөз қызметінен.
Сонымен қатар коммуналдық қызметтер қала инфрақұрылымын қалпына келтіру жұмыстарын жалғастыруда. Қолайсыз ауа райы салдарынан істен шыққан 36 бағдаршамның 29-ы қайта іске қосылды. Сондай-ақ «Горсвет LTD» ЖШС мамандары сыртқы жарықтандыру желілерін жөндеу жұмыстарын жүргізіп жатыр.
– Дауылдан кейін жалпы ұзындығы шамамен 1,2 шақырымды құрайтын оқшауланған сымның 29 аралығы қалпына келтірілді. Қазіргі уақытта тағы алты учаскеде жұмыстар жалғасып жатыр, – делінген ақпаратта.
Нөсер жауынның салдарын жою жұмыстары да аяқталуға жақын. Жаңбыр суын сору бойынша келіп түскен 15 өтініштің 11-і орындалды. Қалған төрт учаскеде жұмыстар әлі де жалғасуда.