Шығыс Қазақстан облысында тұтынушылардың көбіне қай қызмет салаларына жиі шағымданатыны белгілі болды.
ШҚО Сауда және тұтынушылардың құқықтарын қорғау департаментінің мәліметіне сүйенсек, өткен жылы тұрғындар тарапынан барлығы 920 арыз-шағым түскен. Ал осы жылдың басынан бері шағым саны 239-ды құрады.
— Тұрғындар тарапынан ең көп шағым бөлшек сауда саласына қатысты түсті – 389. Электрондық коммерция саласында 231, тұрмыстық қызмет көрсету саласында 180 шағым тіркелді. Тұрғын үй-коммуналдық шаруашылық, қоғамдық тамақтандыру, білім беру, медициналық және байланыс қызметтеріне қатысты да жазбаша шағымдар жасалды, — дейді департамент басшысы Асхат Сағидолдин.
Осы арыз-шағымдардың қорытындысы бойынша 197 әкімшілік іс қозғалды. Ескертулер жасалып, айыппұлдар салынып, кінәлілер тәртіптік жауапкершілікке тартылды.