Шығыс Қазақстан облысы Экология департаментінің мамандары Өскемендегі Согра ықшам ауданындағы су қоймасында балықтың қырылуына байланысты тексеру жүргізіп жатыр.
Әлеуметтік желіде Согра ықшам ауданындағы су қоймасында балықтың қырылғаны жайлы ақпарат тарады. Соған орай экологтар сол жерге шұғыл аттанған.
Департаменттің баспасөз қызметінің мәліметіне сүйенсек, су қоймасынан сынама алынған. Қазір зертханалық сараптама жүргізіліп жатыр. Судың неден ластануы мүмкіндігі анықталып жатыр.
— Жүргізілген зерттеулердің нәтижелері бойынша ластау көздері, осыған қатысы бар тұлғалар немесе ұйымдар анықталады. Оларға Қазақстан Республикасының қолданыстағы заңнамасына сәйкес тексеру шаралары қолға алынады. Жағдай департаменттің бақылауында, — делінген ақпаратта.