Н. Островский атындағы №4 Күршім орта мектебінің мұғалімі Құралай Төлеуова «Зияткер ұстаз» республикалық шахмат турнирінде 50 000 теңге сыйақы иеленді. Жарыс қорытындысы бойынша ол Шығыс Қазақстан облысынан барған қатысушылар арасында үздік ұстаз атанды.
Бастауыш сынып мұғалімдері арасындағы турнирдің ақтық кезеңі қазан айының соңында Астанада өтті. Оған Шығыс Қазақстан облысынан бес педагог қатысты. Делегация мүшелерінің бәрі өңір мектептерінде «Шахмат негіздері» пәнінен сабақ береді. Олар алдымен Қазақстан шахмат федерациясы ұйымдастырған «Білім берудегі шахмат» бағдарламасы бойынша біліктілік арттыру курсынан өтіп, кейін республикалық кезеңде өз шеберлігін көрсетті.