Өскеменде бейнебақылау камералары тұрғындардың қоғамдық орындарда шекілдеуік қабығы мен темекі тұқылдарын тастағанын тіркеді. Барлық дерек бойынша әкімшілік құқық бұзушылық туралы материалдар рәсімделді.
Құқық бұзушылықтар «Таза Қазақстан» аясында анықталды. Әл-Фараби даңғылында 42 жастағы әйел шекілдеуік қабығын жерге тастаған.
30-шы Гвардиялық дивизия көшесінде бірден үш құқық бұзушылық тіркелді. Онда 38 жастағы ер адам мен 18 жастағы қыздар темекі шеккеннен кейін тұқылдарын жерге тастаған.
Сағадат Нұрмағамбетов көшесінде 19 және 35 жастағы азаматтар темекі тұқылдарын қоршау құбырының ішіне тастаған. Қоқысты осылай «жою» да әкімшілік материалдар рәсімдеуге негіз болды.
Құқық бұзушыларға қатысты ҚР Әкімшілік құқық бұзушылық туралы кодексінің 434-2-бабының 1-бөлігі бойынша материалдар рәсімделді. Баптың санкциясы 10 АЕК мөлшерінде айыппұл салуды көздейді. Мұндай құқық бұзушылықтарды анықтау және олардың жолын кесу жұмыстары жалғасып жатыр.