Шығыс Қазақстан облысы әкімінің жеке қабылдауында тұрғындар Ново-Явленка ауылындағы жолдың жағдайын, екі қала тұрғынының баспана мәселесін және «Рахман қайнары» аумағындағы мейрамхананы жалға алу мүмкіндігін талқылады.
Марина Сальникова «KMM TAS» ЖШС карьерінен қиыршық тас таситын ауыр жүк көліктерінің салдарынан Ново-Явленкадағы жол бұзылып жатқанын айтты. Оның сөзінше, жол жабынының жағдайы нашарлап, көтерілген шаң тұрғындардың денсаулығына қауіп төндіріп отыр. Ол жолға су сеуіп, шаңды басуды, шектеу белгілерін орнатуды және жер қойнауын пайдаланушыларды жолды тиісті жағдайда ұстауға міндеттеуді сұрады.
Өскемен әкімдігінің мәліметінше, «КММ ТАС» ЖШС мен «Элхон» ЖШС белгіленген кестеге сәйкес жолға күн сайын су себеді.
Әлішер Қайратұлы көпбалалы отбасын баспанамен қамтуға көмек сұрады. Ол жұбайымен бірге бес бала тәрбиелеп отыр, Өскемен ЖЭО-да жұмыс істейді және пәтер жалдап тұрады. «Көпбалалы отбасы» санаты бойынша тұрғын үй кезегінде 2023 жылдың ақпанынан бері тұр. Жалпы кезекте 9169-орында, ал баспана алуға басым құқығы бар азаматтар арасында 2022-орында. Қала билігі демеушілік көмек есебінен пәтер сатып алу үшін ірі өнеркәсіп кәсіпорындарына өтініш жолдаған, алайда әзірге жауап түспеген.
Кәсіпкер Балауса Бақытжанқызы «Рахман қайнары» шипажайының аумағындағы мейрамхананы жалға алу мүмкіндігін талқылады. Ол құрамына Риддердегі Bal-Uyz этномейрамханасы кіретін мейрамханалар желісінің өкілі. Кәсіпкер жоба қызмет көрсету сапасын жақсартып, аумақтың туристік тартымдылығын арттыруға көмектеседі деп есептейді. Шипажай «ШҚО мемлекеттік-жекешелік әріптестіктің өңірлік орталығы» АҚ балансында тұр. Бастаманы қарастыру үшін кәсіпкер жазбаша өтініш, бизнес-жоспар, қаржылық-экономикалық модель және қызметі мен қаржыландыру көздері туралы құжаттар ұсынуы қажет. Осыдан кейін акционерлік қоғам жобаны бағалап, жалға алудың ықтимал шарттарын қарастыра алады.
Қабылдауға келген тағы бір тұрғын, II топтағы мүгедектігі бар Әсет Төлепбергенов те баспана мәселесі бойынша көмек сұрады. Ол қосалқы жұмысшы болып еңбек етеді, жұмыс орнында тұрады және айына 93 мың теңге жәрдемақы алады. Ол 2022 жылы «Жұмыспен қамту 2020» бағдарламасы бойынша берілген пәтерді жекешелендіріп, кейін оны иеліктен шығарған. Қазір бұрынғы баспанасының мекенжайында тіркеуде жоқ, бірақ 2011 жылдың мамырында енгізілген тұрғын үй кезегінде әлі де тұр.