Шығыс Қазақстан облысының спортшысы Екатерина Таранцева XX жазғы Азия ойындарында есу слаломынан қола медаль иеленді. Бүгін Жапонияның Тоёта қаласында Яхаги өзенінде есу слаломынан әйелдер арасындағы K1 санаты бойынша финалдық жарыс өтті. Бұл бәсекеде Азияның сегіз елінен келген үздік спортшылар сынға түсті.
Қазақстан құрамасы сапында өнер көрсеткен Екатерина Таранцева финалдық кезеңді 112,23 секунд нәтижемен аяқтап, жарыстың қола жүлдесіне ие болды.
Алтын медальді жарыс қожайыны, жапониялық Ито Куруми 107,60 секунд нәтижесімен жеңіп алса, күміс жүлде қытайлық Чэнь Линьге бұйырды. Оның нәтижесі — 111,70 секунд.
Осылайша, Екатерина Таранцева Азия ойындарындағы жүлдесін тағы да қайталап отыр. Ол 2022 жылы Қытайда өткен Азия ойындарында да K1 санатында қола медаль жеңіп алған болатын. Жапониядағы нәтиже — спортшының құрлық додасындағы қатарынан екінші қола жүлдесі.
Есу слаломы — спортшыдан жоғары жылдамдықпен қатар, су ағысын дәл сезінуді, тепе-теңдікті сақтауды және күрделі маневрлерді шапшаң орындауды талап ететін спорт түрі. Жарыс барысында спортшылар табиғи немесе арнайы жасалған су арнасында орналасқан қақпалардан белгіленген тәртіппен өтуі керек. Қақпаға тиіп кету немесе оны өткізіп алу спортшының қорытынды уақытына айып секундтарының қосылуына әкеледі. Сондықтан жарыста әр секунд маңызды.
K1 санатында спортшы бір орындық каякта өнер көрсетеді. Бұл дисциплинада ескек есушінің техникасы, реакция жылдамдығы және судағы қозғалысты дәл басқаруы шешуші рөл атқарады.
Екатерина Таранцеваның бүгінгі жетістігі — спортшының ғана емес, оның жаттығу барысына жетекшілік еткен тәжірибелі бапкерлер Ольга Королева мен Светлана Куликованың да еңбегінің нәтижесі.
Шығысқазақстандық спортшыны және оның бапкерлерін Азия ойындарындағы жүлдесімен құттықтаймыз!