Бұл туралы Орталық коммуникациялар қызметінің брифингінде ШҚО әкімі Нұрымбет Сақтағанов мәлім етті.
Туризм ШҚО экономикасының негізгі өсу бағыттарының біріне айналып отыр. Аймақта төрт басым кластер анықталған:
- Катонқарағайдағы Wellness-туризм;
- Марқакөлдегі экологиялық туризм;
- Риддердегі тау шаңғы туризмі;
- Өскемен мен көршілес аудандардағы демалыс туризмі
Бұл бағыттар инвестицияларды тартуға, инфрақұрылымды дамытуға және жаңа жұмыс орындарын құруға мүмкіндік береді.
Қыс мезгілінің ерте келуі мен көп қар тау шаңғы саласы үшін ерекше жағдай жасайды. Курорттардың тиімділігін арттыру жоспары аясында Риддер маңында «Анатау» жыл бойы жұмыс істейтін кешені салынып жатыр, ол тау туризмі мен спортшыларды даярлау орталығы болады. Халықаралық қонақүй компаниясы PanaAsia халықаралық стандарттарға сай заманауи қонақүйлер салуда.
Медициналық туризм де қарқынды дамып келеді: Онкология және хирургия орталығы базасында ЧЕК-АП қызметтері көрсетіледі, олар Өскеменде 500 АҚШ долларын құрайды, ал Кореяда ұқсас қызметтердің бағасы 5–10 мың долларды құрайды.
Туристерді тартуға AltaiFest және «Шығыс Салбурыны-2025» этномәдени фестивалі сияқты имидждік жобалар ықпал етеді. Фестивальге Қазақстаннан, Ресейден, Қытайдан, Испаниядан, Венгриядан, Моңғолиядан және Қырғызстаннан келген 148 бүркітші қатысты және 10 мыңнан астам көрермен жиналды.