26 мамырда Өскемен қаласындағы Тәуелсіздік монументі жанында «Алтайдан Оралға дейін» республикалық велошеруіне ресми түрде старт берілді. Іс-шара Жұмысшы мамандықтар жылы аясында ұйымдастырылып отыр.
Салтанатты шараға Шығыс Қазақстан облысы әкімінің орынбасары Ербол Нұрғалиев, спорт қауымдастығының өкілдері, колледж оқытушылары мен студенттері қатысты.
— Велошеруге 236 адам қатысып, оларға қаладағы техникалық және кәсіптік білім беру мекемелерінің 200-ден астам студенті қосылды. Ауқымды шараның мақсаты — жұмысшы мамандықтарын насихаттау, еңбекке деген құрметті қалыптастыру және жастар арасында салауатты өмір салтын ұстану қағидаттарын ілгерілету, — деп хабарлады облыс әкімдігінен.
Велошеру бағыты Қазақстанның сегіз өңірін қамтиды: Шығыс Қазақстан, Абай, Павлодар, Ақмола, Қостанай, Ақтөбе, Батыс Қазақстан облыстары мен Астана қаласы. Мәреге жету 2025 жылғы 8 маусымға жоспарланған.