Қалалық №2 соты баспасөз қызметінің мәліметіне сүйенсек, ҚР ТЖМ Өнеркәсіптік қауіпсіздік комитеті Шығыс Қазақстан облысы бойынша департаментінің бастығына қатысты қызмет бабын асыра пайдаланғаны үшін қылмыстық іс қаралды.
— Белгілі болғандай, департамент мамандары 2024 жылдың наурыз айында шахталарды жоспардан тыс тексеру нәтижесінде еңбек қауіпсіздігі талаптарын бұзу фактілерін анықтаған. Осылайша, сол шахтаға жұмысшылардың түсуіне тыйым салынуы тиіс болған. Алайда айыпталушы өз қызметкерлеріне бұл туралы прокуратураға хабарламау туралы тапсырма берді. Демек, департамент бастығы жұмысшылардың қауіпсіз еңбек жағдайларына қатысты конституциялық құқықтарын бұзып, ЖШС қызметін тоқтата тұру туралы сотқа талап арызбен жүгінбеген, — делінген ақпаратта.
Сот барысында сотталушы өз кінәсін толық мойындады. Сот шешімімен оған 1500 АЕК (5 538 000) теңге айыппұл салынып, мемлекеттік қызметте жұмыс істеуге өмір бойына тыйым салынды. Үкім әлі заңды күшіне енген жоқ.
