Облыстық Жер қатынастары басқармасының мәліметінше, өңір халқына мал шаруашылығымен айналысу үшін 69,9 мың гектар жайылымдық жер қажет.
— 2024 жылы мемлекетке пайдаланылмай бос жатқан 117 мың гектар жер қайтарылды. Осының нәтижесінде, азаматтардың жайылымдық жер қажеттілігі толықтай өтелді. 67 мың гектар жер пайдаланушылардың өз еркімен бас тартуымен, 35 мың гектар жалдау мерзімінің аяқталуымен, 3,3 мың гектар жергілікті атқарушы органдардың шешімдерін жоюымен, 2,4 мың гектар жер сот шешімі арқылы қайтарылған, — дейді басқарма басшысы Надежда Михейлис.
Оның айтуынша, «Жайылымдар туралы» ҚР Заңына енгізілген өзгерістерге сәйкес, жайылымдарды басқару және пайдалану жоспарлары жергілікті бюджет есебінен әзірленеді.
— Облыстың геопорталы арқылы жер учаскелерінің кадастрлық құнын анықтау, инженерлік желілер карталарын көру, атмосфералық ауаның жағдайын онлайн бақылау, экология және қылмыс деректерімен жұмыс істеу мүмкіндіктері қамтамасыз етілген. Геопортал әртүрлі мемлекеттік деректер базаларымен біріктірілген. Бұл жер қорының басқару жұмысын тиімді етеді, — деп түсіндірді Надежда Михейлис.
