Қазақстанның авиациялық әкімшілігінде Экспорттық бақылау және шекара қауіпсіздігі бағдарламасының (EXBS) басшылығымен және Қазақстан Республикасындағы АҚШ елшілігінің өкілдерімен кездесу өтті.
Қатысушылар бірлескен жұмыстың қорытындысын шығарып, авиациялық қауіпсіздік саласындағы ынтымақтастықты одан әрі дамыту мәселелерін талқылады. Негізгі назар Қазақстанға EXBS бағдарламасы аясында көрсетіліп жатқан практикалық көмекке аударылды.
Ынтымақтастық жылдары АҚШ тарапы Қазақстанның авиация саласы мамандары үшін арнайы оқыту курстары мен халықаралық танысу сапарларын ұйымдастырды. Соның арқасында сала қызметкерлері шетелдік тәжірибені және қауіпсіздікті қамтамасыз етудің заманауи тәсілдерін зерделеуге мүмкіндік алды.
Қазақстан әуежайларына заманауи тексеріп-қарау жабдықтары да берілді. Бұл жабдықтар әуежайлардың техникалық мүмкіндіктерін нығайтып, авиациялық қауіпсіздік шараларының тиімділігін арттырды.
Тараптар бірлескен жұмысты жалғастыруға дайын екенін растады. Негізгі бағыттардың қатарында мамандар даярлау, халықаралық тәжірибе алмасу және Қазақстанның авиациялық қауіпсіздік жүйесін одан әрі жетілдіру бар.
Қазақстанның авиациялық әкімшілігі АҚШ тарапына жүйелі қолдауы және елдің азаматтық авиация қауіпсіздігін дамытуға қосқан үлесі үшін алғыс білдірді.