Осыған қатысты сот ісі Катонқарағай аудандық сотында қаралды. Анықталғандай, айыпталушы танысының үйінде қонақта болып, бірге алкогольді ішімдік ішкен. Үй иесі ұйықтап қалғаннан кейін ер адам ұрлық жасауға бел буған.
Іс материалдарына сәйкес, ол алдымен бөлмелердің бірінде тұрған ақша салынған сандықша мен «Кизляр» маркалы пышақты қолды еткен. Кейін шкафтан кілт тауып алып, сейфті ашып, ішінен «ИЖ-79-8» маркалы газ тапаншасын ұрлаған.
Келтірілген материалдық шығынның жалпы көлемі 250 мың теңгені құрады.
Сот барысында айыпталушының кінәсі жәбірленуші мен куәгердің айғақтарымен, тергеу әрекеттерінің хаттамаларымен және заттай дәлелдемелермен толық дәлелденді.
Прокурор судьядан ер адамға бас бостандығынан айыру жазасын тағайындауды сұрады. Ал сотталушы кінәсін толық мойындап, өзін бас бостандығынан айырмауды өтінді.
Сот ер адамды кінәлі деп танып, оны 3 жыл 6 ай мерзімге бас бостандығынан айыру жазасына кесті.
Үкім әлі заңды күшіне енген жоқ.