Өскемен қаласындағы «Казцинк» компаниясының өкілдері апат кезінде зақымданған қондырғыға қатысты мән-жайды түсіндіріп берді.
Қала тұрғындарының арасында кәсіпорындағы ауа тазарту құрылғыларының бірі жарылған болуы мүмкін деген сыбыс тарады. Алайда компания өкілдері бұл басқа технологиялық қондырғы екенін түсіндірді.
— Көпшілік ойлағандай, бұл шаң ұстағыш қондырғы емес. Ол жабдық метал өндіру кезінде реагент ретінде қолданылатын технологиялық шаң шығаруға арналған, — деді «Казцинк» ЖШС басқарушы директоры Андрей Лазарев.
Оның айтуынша, зақымданған қондырғы өндірістегі шығарындыларды тазарту процесінде қолданылмаған. Сондықтан оның тоқтауы кәсіпорынның экологиялық жүйелерінің жұмысына әсер етпейді.
— Барлық экологиялық жүйелер штаттық режимде жұмыс істеп тұр. Ауа сапасына мониторингті кәсіпорынның өз зертханасы да, мемлекеттік қызметтер де тұрақты түрде жүргізуде, — деді ол.
Қазіргі уақытта өндіріс жалғасып жатыр. Алайда қуаттылық уақытша төмендетілген.