Өскемен қаласының прокуратурасы ойын-сауық орындарының кәмелетке толмағандарды түнгі уақытта кіргізгені үшін жауапкершілікке тарту барысында жүйелі заңбұзушылықтарды анықтады. Бұл туралы ШҚО прокуратурасының баспасөз қызметінен хабарлады.
Тексеру нәтижесінде, түнгі клубтар мен өзге де мекемелерде жасөспірімдердің жүргені жайлы деректер анықталған жағдайда жауапкершілік көбіне әкімші немесе басқа да қызметкерлер секілді жекелеген тұлғаларға жүктелгені белгілі болды. Ал мекеме иесінің әрекеттеріне тиісті құқықтық баға берілмеген.
Прокуратура мәліметінше, құқықбұзушылықтар қайталанғанның өзінде істер ӘҚБтК-нің 132-бабы 1-бөлігі бойынша сараланған. Себебі әр жолы бір мекеменің әртүрлі лауазымды тұлғалары жауапқа тартылып отырған. Соның салдарынан мекемелерге қатысты қатаң шаралар іс жүзінде қолданылмай келген.
— Мұндай формалды тәсіл кәмелетке толмағандардың түнгі уақытта ойын-сауық орындарында еркін жүруіне жағдай жасаған. Тексеру қорытындысы бойынша қала прокуратурасы анықталған заңбұзушылықтарды жоюды талап етіп, прокурорлық қадағалау актісін енгізді. Уәкілетті органдарға құқықбұзушылықтарды дұрыс саралау қажеттігі ескертілді, — делінген ақпаратта.