Шығыс Қазақстан облысында былтыр қару айналымына қатысты 103 құқықбұзушылық анықталды. Ал осы жылдың алғашқы екі айының өзінде бұл көрсеткіш 106-ға жеткен. Бұл туралы ШҚО ПД Қоғамдық қауіпсіздік басқармасының бастығы Орал Рыспаев Өңірлік коммуникациялар қызметінде өткен брифинг барысында мәлім етті.
— Құқықбұзушылықтардың басым бөлігі қару иелерінің салғырттығы салдарынан болып отыр. Көп жағдайда қару иелері қаруды сақтау және пайдалану талаптарын толық сақтамайды. Мәселен, уақытылы тексерістен өтпеу, қару сақталатын сейфке орнатылған сигнализацияны қоспау сияқты жағдайлар кездеседі, — деді ол.
Сонымен қатар кейбір азаматтар қару сақталатын сейфке алтын бұйымдар мен ақшаны бірге сақтайтыны да анықталған. Бұл қауіпсіздік талаптарына қайшы келеді.
— Тағы бір назар аударарлық жайт — тіркелген қару иелері санының азаюы. Мәселен, 2025 жылы өңірде 8768 қару иесі тіркелген болса, 2026 жылы олардың саны 8340 адамды құраған. Бұл көрсеткіш қару сақтау талаптарының күшеюімен және азаматтардың қаруды ерікті түрде тапсыруымен байланысты болуы мүмкін, — деді Орал Рыспаев.