Өскемен қаласында қоғамдық көлікті жаңарту және маршруттық желіні дамыту жұмыстары жалғасып жатыр. Бұл туралы қала әкімі Алмат Ақышов тұрғындармен өткен есептік кездесу барысында мәлімдеді.
Оның айтуынша, тұрғын аудандардың кеңеюіне байланысты автобус бағыттары мен рейстер санын көбейту қажеттілігі туындап отыр. Осындай мәселелердің бірі Әл-Фараби даңғылының тұрғындары тарапынан көтерілді. Аталған ауданда бірнеше көпқабатты тұрғын үй орналасқанымен, қазіргі қоғамдық көлік бағыты жолаушылар ағынын толық қамти алмай келеді.
Осыған байланысты қала әкімі тиісті қызметтерге мәселені пысықтауды тапсырды. Атап айтқанда, қолданыстағы бағыттағы рейстер санын көбейту және қосымша автобус шығару мүмкіндігін қарастыру қажет.
Алмат Ақышов облыс орталығында автопаркті жаңарту жұмыстары кезең-кезеңімен жүргізіліп жатқанын атап өтті. Өткен жылы қала үшін 45 жаңа автобус, 14 шағын автобус және үш заманауи трамвай сатып алынған.
Сонымен қатар жақын уақытта Өскеменге 12 электрлі автобус жеткізіледі. Олар қалалық бағыттарда пилоттық режимде қызмет көрсетеді. Әкімнің айтуынша, экологиялық таза көлікті енгізу — қаланың қоғамдық көлік жүйесін жаңғыртудың маңызды қадамы болмақ.