ШҚО Полиция департаменті баспасөз қызметінің мәліметіне сүйенсек, тәртіп сақшылары өңір аумағында «Жасөспірім» жедел алдын алу шарасын жүргізді.
— 3 күнге созылған рейдтерге 500-ден астам полицей қатысты. Профилактикалық есепте тұрған отбасылар тексеріліп, жастар көп жиналатын орындар бақылауға алынды. Соның нәтижесінде 161 әкімшілік құқық бұзушылық анықталды, — делінген ақпаратта.
11 кәмелетке толмаған бала және бала тәрбиесіне немқұрайлы қараған 17 заңды өкіл профилактикалық есепке қойылды. Қабылданған шаралар ауыр зардаптардың алдын алуға және тәуекел тобындағы отбасылардағы жағдайды уақытылы түзетуге мүмкіндік берді.
Сонымен қатар полиция қызметкерлері өңірдегі мектептер мен колледждерде 150-ден астам кездесу мен дәріс өткізді. Жасөспірімдерге заңнама нормалары, жауапкершілік мәселелері мен жеке таңдау жасаудың маңызы түсіндірілді.