Қазіргі таңда Өскемен қаласының орталығын сол жағалау ауданымен байланыстыратын жаңа көпірдің құрылыс жобасы әзірленіп жатыр. Жаңа көпір қаладағы көлік кептелісі мәселесін шешуде маңызды рөл атқармақ.
Облыс орталығында жыл сайын автокөлік саны артып келеді. Таңертең және кешке жолдарда жиі кептеліс болады. Жаңа көпір Меновное кентінде салынып, Серікбаев көшесіне қарай шығады.
— Қалада логистикалық жағдай күрделене бастады, сондықтан көпір құрылысы аса өзекті. Қазіргі таңда жоба әзірлену үстінде, жақын арада сараптамаға жіберіледі. Келесі жылдың екінші тоқсанында жоба толық дайын болады. Одан кейін қаржыландыру мәселесі қаралады. Егер бәрі сәтімен болса, құрылыс жұмыстары келесі жылы басталуы мүмкін, — деді Өскемен қаласының әкімі Алмат Ақышов.
Алдын ала мәліметтерге сәйкес, көпірдің ұзындығы шамамен 834 метрді құрайды. Ол алты жолақты болады, әр жолақтың ені — 3,5 метр.