Шығыс Қазақстан облысында ЖРВИ-ге шалдыққандар саны артып келеді. Десе де әзірге шектеулер енгізілмеді.
ШҚО санитарлық-эпидемиологиялық бақылау департаментінің мәліметіне сүйенсек, биыл өңірде жергілікті бюджет есебінен «Гриппол плюс» вакцинасының 75 мың дозасы сатып алынған. Бұдан бөлек, жұмыс берушілер мен жеке клиникалар тағы екі мың доза алған.
— Бүгінде 74 530 адам вакцина салдырды. Бұл облыс халқының 10 пайыздан астамы. Оның ішінде 72 519-ы қауіп тобына жататындар. Олардың қатарында жүкті әйелдер, медицина қызметкерлері, диспансерлік есептегі балалар, интернат тәрбиеленушілері, қарттар үйінің тұрғындары және созылмалы ауруға шалдыққан адамдар бар, — деді департамент басшысы Қанат Тұрдиев.
Оның айтуынша, маусымдық вирустар бойынша жағдай бақылауда.
— 1 қазаннан 17 қарашаға дейін облыста 45 937 ЖРВИ тіркелді. Науқастардың шамамен 60 пайызы — балалар. Көрсеткіштер өткен эпидемиялық маусым деңгейіне сәйкес келеді, сондықтан қосымша шектеулер енгізілген жоқ, — деді ведомство мамандары.
Зертханалық түрде расталған тұмау жағдайлары — 5. Барлығында да A/H3N2 вирусы, яғни «гонконг тұмауы» анықталған.
Тұмаудан бөлек, өңір зертханаларында өзге де респираторлық вирустар анықталып жатыр. Зерттелген 368 сынаманың 93-і оң нәтиже көрсеткен. Олар негізінен риновирус пен аденовирус.