ШҚО-да алаяқтар халықты алдаудың жаңа әдістерін ойлап тапты

Шығыс Қазақстан облысында интернет және телефон арқылы жасалатын алаяқтық фактілері жиілеп кетті. Алаяқтар көлік жүргізушілеріне жол ережесін бұзғаны жөнінде жалған қаулылар жіберіп, өздерін энергетика компанияларының қызметкері ретінде таныстырып қоңырау шалып жатыр. Бұл туралы ШҚО Полиция департаментінен мәлім етті.
— Жалған хабарламалар мессенджерлер мен электронды пошта арқылы таратылады. Онда азаматтың аты-жөні мен автокөлік нөмірі секілді нақты деректер көрсетіліп, «айыппұлды төлеу» үшін арнайы сілтемеге өтуді сұрайды. Алайда сілтемеге өтіп, банк картасының деректерін енгізген сәтте алаяқтар азаматтың есепшотына толықтай қол жеткізеді. Кейбір сілтемелер құрылғыға зиянды вирустар жүктеп, жеке ақпаратты ұрлауға бағытталған, — делінген ақпаратта.
Полицейлер ресми айыппұлдар туралы хабарламалар тек 1414 қысқа нөмірінен жіберілетінін және ешқашан төлем жасауға арналған сілтемелер болмайтынын ескертті. Айыппұлдарды тек egov.kz, qamqor.gov.kz порталдары немесе банктердің мобильді қосымшалары арқылы тексеруге болады.
Сонымен қатар өңір тұрғындарына өзін «энергетикалық компания қызметкері» ретінде таныстыратындар хабарласып жатыр. Олар қысқы кезеңге дайындық аясында есептегішті тексеру қажет екенін айтып, актіге қол қоюды сұрайды. Сөйтіп телефонға келген кодты айту қажет деп тұзаққа түсіреді.