Зайсан ауданында халыққа бейәдеп сөздер айтқан ауыл әкіміне 55 048 теңге көлемінде айыппұл салынды.
Осыған байланысты сот ісі Зайсан аудандық сотында қаралды.
— Шілікті ауылының әкімі 6 қазанда сағат 15:00 шамасында өзінің қызметтік кабинетінде айналасындағыларға құрметсіздік танытып, бейәдеп сөздер айтқан. Сот процесі барысында өз кінәсін мойындаған ол бұл әрекетіне өкінетінін жеткізіп, көпшілік алдында кешірім сұрады, — деп хабарлады ШҚО сотының баспасөз қызметінен.
Сот шешімімен әкім ҚР ӘҚБтК-нің 434-бабының 1-бөлігі (ұсақ бұзақылық) бойынша кінәлі деп танылып, 55 048 теңге көлемінде айыппұл төлеуге міндеттелді. Қаулы әлі заңды күшіне енген жоқ.