Таяуда Бобровка ауылының халқы елді мекен шетіне аю кіріп кетіп, бірнеше омартаны бүлдіргенін жеткізген болатын. Сол кезде «Орман және аңшылық шаруашылығы» ММ қызметкерлері хабар түсе салысымен ауылға қарай жолға шыққан.
— Біздің инспекторлар аюды бірнеше күн бойы іздеді. Алайда аю да, оның ізі де табылмады, — дейді мемлекеттік мекеменің баспасөз хатшысы Мақсат Шакиров.
Оның айтуынша, аюлар әдетте елді мекендерге азық іздеп барып жатады.
— Қазір омарталардың көбісі жылжымалы болып келеді және оларды ауылға жақын орналастырып жатады. Аю сол бал иісіне қарай келуі де мүмкін, — дейді М.Шакиров.
