5 ақпан күні кешкі уақытта облыстық Девиантты мінез-құлқы бар балаларға арналған арнайы мектеп-интернатының 4 тәрбиеленушісі белгісіз жаққа қашып кеткен. Бұл туралы мектеп әкімшілігі Серебрянск қаласының полиция бөліміне дереу хабарлаған. Содан соң тәртіп сақшыларды оларды іздестіре бастады.
ШҚО Балалар құқықтары жөніндегі уәкілі Ақсана Қаленованың айтуынша, жасөспірімдер үш жарым сағаттан соң табылды. Олардың қол-аяғын бірінші және екінші дәрежелі үсік шалған.
— Бұл оңай балалар емес. Талап бойынша олар ауланы аралай алады, бірақ мектептен тыс жерге шыға алмайды. Бұл жабық мекеме екенін ескерсек, расымен де қызметкерлер тарапынан балаларға қандай да бір қысым жасау фактілері болуы мүмкін. Бірақ әзірге нақты ештеңе айтуға болмайды. Полицейлер оқиғаның себептерін анықтап жатыр. Әрине, қызметкерлердің кінәсі дәлелденсе, тиісті шара қолданылады, — дейді ол.
Екі тәрбиеленуші қазіргі уақытта медициналық мекемеде, олардың денсаулығы тұрақты. Ал екі бала тексеру жүргізілгеннен кейін мектепке қайтарылды.