Бүгін таңғы сағат 05.00-де Усть-Таловка ауылын аудан орталығымен байланыстырып тұрған магистральдық желіден ақау шығып, су ағып кеткен. Бір сағаттың ішінде мамандар ақау орнын анықтап, қалпына келтіру жұмыстарын бастады.
Бұл желілер «Востокэнерго» жеке компаниясына тиесілі. Бұған дейін де олар желідегі ақауды жөндеген. Алайда жағдай қайталанып отыр. Қазір сол жерге Шығыс Қазақстан облысы әкімінің орынбасары Бақытжан Баяхметов, ШҚО Энергетика және тұрғын үй-коммуналдық шаруашылық басқармасының басшысы Нұрлан Рамазанов пен Шемонаиха ауданының әкімі Григорий Акулов жүр. Барлық қажетті техника жұмыс істеп жатыр.
— Жұмысты аяқтау үшін тағы үш сағаттай уақыт керек. Одан кейін қайта жылу беріле бастайды, — деді Нұрлан Рамазанов.
Аудан әкімі Григорий Акуловтың айтуынша, балалар қашықтан оқу форматына алдын ала көшірілген. Сондай-ақ Денсаулық сақтау басқармасының басшысы аудандық ауруханада болып, медициналық мекемедегі ауа температурасы 22 градусты құрап тұрғанын жеткізді. Тұрғындар қалыптасқан жағдайға түсіністік танытты. Алдағы уақытта ақаудың шығу себептерін мамандар анықтайтын болады.