Бұл туралы бүгін ҚР Президенті жанындағы Орталық коммуникациялар қызметінің көшпелі баспасөз конференциясында Шығыс Қазақстан облысының әкімі Ермек Көшербаев мәлім етті.
— Ауыл шаруашылығы — Шығыс Қазақстан экономикасының күретамыры. Бұл саланы дамыту — басты міндеттердің бірі.
Биыл дәнді және майлы дақылдардың өнімділігі 25 пайызға өсіп, экспорт ұлғайды. Өңделген өнімдердің экспорты бір жылда 37,6-ден 65,5 пайызға дейін өсті. Күнбағыс майын өндіруден Шығыс Қазақстан елімізде 1 орында тұр. Нақты айтқанда, жылына 255 мың тонна.
Келешекте облыстың экспорттық потенциалын көтеру үшін осы жылы халықаралық шаралар шеңберінде экспортқа өсімдік майын тасымалдауға бірнеше ірі келісім-шарт жасастық, — дейді ол.
Облыс әкімінің айтуынша, ҚХР халықаралық көрмесінде 11 млн доллардың келісім-шартына қол қойылған. Ал Самарқандта өткен 4-ші «Қазақстан-Өзбекстан» халықаралық ынтымақтастық форумында 12 млн долларға келісім-шарт жасалды.
— Ұлан мен Зайсан аудандарында суды үнемдейтін агротехнологиялар бойынша ірі жобалар жүзеге асырылып жатыр. «Ертіс» әлеуметтік кәсіпкерлік корпорациясының» қатысуымен «ERTIS BEREKE OSKEMEN» компаниясы бірлескен кәсіпорын құрып, «Su Bereke» брендімен отандық тамшылатып суару қондырғысын өндіруге кірісті. Жобаға жергілікті бюджеттен 1,6 млрд теңге бөлінді. Сондай-ақ Өскеменде жылына 50 мың тонна шикізат өндіретін «Алтай май» май экстракциялау зауытының құрылысы аяқталады. Бұл зауыт өңделген өнімнің көлемін 595 мың тоннадан 700 мың тоннаға дейін өсіруге мүмкіндік береді. Өсімдік майының экспорты бір жарым есеге ұлғаяды, — дейді Ермек Көшербаев.