Қазақстан мен Пәкістан медициналық білім беру саласындағы ынтымақтастықты кеңейтуде. Денсаулық сақтау министрлігінің қолдауымен Астана медицина университеті мен Пәкістанның білім беруді мақсатты қаржыландыру қоры PAK-EEF өзара түсіністік туралы меморандумға қол қойды.
Құжат болашақ дәрігерлер мен мейіргерлерді халықаралық стандарттарға сай даярлауды, бірлескен ғылыми жобаларды дамытуды, студенттер мен оқытушылардың академиялық ұтқырлығын, сондай-ақ мамандардың біліктілігін арттыруды көздейді.
Ынтымақтастықтың жаңа бағыттарын Қазақстанның денсаулық сақтау министрі Ақмарал Әлназарова мен Пәкістанның федералдық білім беру және кәсіптік оқыту жөніндегі мемлекеттік министрі Ваджиха Камар талқылады.
– Біз халықаралық ынтымақтастықты жаңа буын мамандарын даярлаудың аса маңызды құралдарының бірі деп санаймыз. Бүгінде Қазақстанның медициналық университеттері әлемдік білім беру кеңістігіне белсенді кірігіп, ғылыми ынтымақтастықты дамытып, шетелдің жетекші жоғары оқу орындарымен бірлескен жобаларды жүзеге асырып келеді, – деді Ақмарал Әлназарова.
Кездесуде Қазақстан Президенті Қасым-Жомарт Тоқаевтың Пәкістанның білім беруді мақсатты қаржыландыру қорына гуманитарлық грант бөлу туралы шешіміне ерекше назар аударылды. Бұл бастама білім, ғылым және денсаулық сақтау салаларындағы бірлескен жұмыстың мүмкіндіктерін кеңейтті.
Астана медицина университеті қазірдің өзінде Пәкістанның жетекші медициналық университеттерімен және клиникаларымен ынтымақтастық орнатқан. Жаңа меморандум бұл жұмысты келесі деңгейге шығаруға тиіс.
Тараптар дәрігерлер мен мейіргерлерді даярлау бағдарламаларын дамытып, студенттер, оқытушылар мен сарапшылар алмасуды ұйымдастыруды жоспарлап отыр. Сондай-ақ бірлескен ғылыми зерттеулер жүргізіп, медицина қызметкерлерінің біліктілігін арттырмақ.
– Астана медицина университетінің заманауи білім беру және клиникалық базасы, мықты профессор-оқытушылар құрамы және халықаралық жобаларды жүзеге асыруда мол тәжірибесі бар. Бұл мамандарды үздік әлемдік стандарттарға сай даярлауға мүмкіндік береді, – деп қорытындылады Ақмарал Әлназарова.