Өскеменде қаланы санитарлық тазарту науқаны басталды. Мамыр айының соңына дейін сенбіліктер апта сайын ұйымдастырылып отырмақ.
Алғашқы ауқымды сенбілік өткен демалыс күндері өтті. Оның барысында бірнеше танымал қоғамдық орын ретке келтірілді. Шаһар тұрғындары қыс мезгілінде жиналып қалған қоқыстың едәуір бөлігін жинап шықты.
Қала әкімдігінің мәліметінше, тазалық жұмыстары алдағы уақытта да жалғасады. Өскеменде 4 сәуір мен 30 мамыр аралығында екі айлық санитарлық тазарту науқаны жарияланды. Осы кезеңде әр сенбі сайын тұрғындар, кәсіпорындар мен коммуналдық қызмет өкілдерінің қатысуымен экологиялық акциялар өткізу жоспарланған.
— Тұрғындарды сенбіліктерге белсенді қатысып, аулаларда, тұрғын үйлер маңында және қоғамдық орындарда тазалық жұмыстарын жүргізуге шақырамыз. Келесі сенбілік 11 сәуірде өтеді, — делінген ақпаратта.