Риддердегі жылу орталығында 5 қазандықтың істен шыққаны жайлы ақпарат — жалған

Бүгін таңертеңнен Риддер тұрғындары үйлеріндегі батареялардың салқындап, ыстық судың да әрең жылып тұрғанына шағымданды.
Әлеуметтік желіде қаладағы жылу электр орталығында штаттан тыс жағдай болып, соның салдарынан станциядағы бес қазандық агрегаты тоқтап, тек біреуі ғана жұмыс істеп тұрғаны туралы ақпарат тарап кетті. Алайда қала әкімдігі бұл мәліметті жоққа шығарып, ЖЭО-ның қазіргі уақытта штаттық режимде жұмыс істеп тұрғанын және ешқандай апат болмағанын мәлім етті.
Ал пәтерлерінің салқындағанына қатысты тұрғындардың шағымына «Шығыс Жылу» АҚ-дан жауап берді.
— 13 наурызда АҚ филиалының жабдықтарын ауыстыру жұмыстары жүргізілді. Қазіргі уақытта орталық жұмысының параметрлері нормативтік деңгейге келтірілді. Уақытша қолайсыздықтар үшін тұтынушылардан кешірім сұраймыз, — деп хабарлады «Шығыс Жылу» АҚ-ның Риддердегі филиалынан.