Өскемен тұрғындары мен қала қонақтары үшін 28 ақпан күні «Шешек» демалыс аймағында отбасылық фестиваль ұйымдастырылмақ. Сағат 10:00-ден 16:00-ге дейін жалғасатын фестиваль биылғы қыс маусымындағы соңғы ауқымды іс-шаралардың бірі болмақ.
Ұйымдастырушылар барлық жастағы қатысушыларға арналған мазмұнды бағдарлама әзірлеген. Балалар мен жасөспірімдер үшін аниматорлар жұмыс істеп, түрлі ойындар, байқаулар мен шеберлік сабақтары өткізіледі. Ал ересектерге арнап кәуап дайындалатын гриль-аймақ, ыстық сусындар ұсынылатын алаңдар қарастырылған.
Сондай-ақ қонақтарды командалық ойындар, көңілді эстафеталар, тимбилдинг бағдарламалары мен сахналық шоу күтеді. Белсенді демалысты ұнататындар тюбингпен сырғанап, атқа мініп серуендей алады, тіпті әуе шарымен көтерілуге де мүмкіндік бар.
Ұйымдастырушылардың айтуынша, фестиваль – таза ауада отбасымен уақыт өткізіп, қысты әсерлі көңіл күймен шығарып салуға тамаша мүмкіндік.