Қаладағы реттелмеген жаяу жүргіншілер өткелдерінің бірінде «Argus. Жаяу жүргіншілер өткелі» автоматтындырылған жүйесі орнатылды. Кешеннің басты міндеті — жүргізушілерді жаяу жүргіншілерге жол беруге дағдыландыру және қауіпті учаскедегі апаттылық деңгейін төмендету. Бұл туралы ШҚО полиция департаменті хабарлап отыр.
— Жүйе жолақтағы жаяу жүргіншіні автоматты түрде анықтайды және көліктердің қозғалыс траекториясын бақылайды. Егер жүргізуші жол бермесе, кешен заң бұзушылықты фото мен видеоға түсіріп алады. Мәліметтер айыппұл толтыру үшін бірден серверге жіберіледі, — делінген ақпаратта.
Қазіргі уақытта Әкімшілік құқық бұзушылықтардың бірыңғай тізілімі ақпараттық жүйесінде кешенді сынақтан өткізу және реттеу жұмыстары жүргізілуде. Барлық техникалық процедуралар аяқталғаннан кейін жүйе штаттық режимде жұмыс істейтін болады.