Шығыс Қазақстан облысының Зайсан аудандық сотында ҚР Қылмыстық Кодексінің 189-бабы (сеніп тапсырылған бөтен мүлікті ірі мөлшерде иелену немесе ысырап ету) бойынша қылмыстық іс қаралды.
Белгілі болғандай, ЖШС-ның азық-түлік қоймасында есепші-кассир болып жұмыс істеген әйел адам 2025 жылдың тамыз-қазан айлары аралығында компания кассасынан жалпы сомасы 10 844 549 теңгені жымқырған.
Шығыс Қазақстан облыстық соты баспасөз қызметінің мәліметіне сүйенсек, сот айыпталушының өкінуі мен кәмелетке толмаған балаларының болуын қылмыстық жауапкершілік пен жазаны жеңілдететін мән-жайлар ретінде таныды.
— Сот үкімімен сотталушыға мүлкін тәркілей отырып, 3 жыл 6 ай мерзімге бас бостандығын шектеу жазасы тағайындалды. Сонымен қатар материалдық шығынды өндіру туралы азаматтық талап қанағаттандырылды. Үкім әлі заңды күшіне енген жоқ, — делінген ақпаратта.