Қаржылық мониторинг агенттігінің елордалық департаменті World Business Consulting қаржы пирамидасының құрылымдық бөлімшесін құру және оған басшылық ету дерегі бойынша тергеуді аяқтады. Күдікті Грузияда ұсталып, Қазақстанға экстрадицияланды.
Тергеу мәліметінше, әйел 2020 жылы азаматтардың ақшасын инвестициялық бағдарламаларға қатысу деген желеумен тартқан. Салымшыларға жоғары табыс уәде етілген. Алайда компанияның тиісті лицензиясы болмаған және іс жүзінде ешқандай инвестициялық операция жүргізбеген.
Ақша қолма-қол қабылданып, бухгалтерлік құжаттар рәсімделмеген. Схеманы сенімді етіп көрсету үшін салымшыларға онлайн-платформада жеке кабинеттер ашылған. Онда жалған «табыстылық» көрсетіліп отырған. Экрандағы сандар өскенмен, нақты инвестиция жасалмаған.
Жиналған қаражат қаржы пирамидасына тән классикалық тәсілмен қайта бөлінген. Бұрын тартылған қатысушыларға төлем жаңа салымшылардың ақшасы есебінен жасалған.
Клиенттік базаны кеңейту үшін ұйымдастырушылар таныстырылымдар мен үгіт-насихат шараларын өткізген. Сондай-ақ БАӘ мен Түркияға сапарларды пайдаланған.
ҚМА мәліметінше, дер кезінде қабылданған шаралардың арқасында қаржы пирамидасының қызметі бастапқы кезеңде тоқтатылды.
2024 жылы күдікті халықаралық іздеуге жарияланды. Сот оған сырттай қамауда ұстау түріндегі бұлтартпау шарасын санкциялады.
2026 жылғы қаңтарда әйел Грузияда ұсталып, кейін Қазақстанға экстрадицияланды. Сот санкциясымен оның жер теліміне тыйым салынды.
Қылмыстық іс сотқа жолданды. ҚПК-нің 201-бабына сәйкес өзге ақпарат жарияланбайды.