Қаржылық мониторинг агенттігінің Шығыс Қазақстан облысы бойынша департаменті Шығыс Қазақтан және Абай облыстарындағы 7 ауданда салынуы керек болған 11 әлеуметтік нысанға бөлінген бюджет қаражатын жымқырды деген күдікке ілінген «QazConstructions» ЖШС басшылығына қатысты алдын ала тергеу жүргізуде.
Тергеу деректеріне сүйенсек, күдіктілер арасында Күршім аудандық мәслихатының депутаты, компанияның бұрынғы директорының орынбасары да бар. Әлеуметтік жобаларды жүзеге асыруға бөлінген қаржы кәсіпорындар арқылы қолма қол ақшаға айналдырылған.
Соның салдарынан төрт дене шынықтыру-сауықтыру кешені мен 20 мыңнан астам тұрғыны бар 7 ауылды ауызсумен қамтамасыз етуге арналған су жүйелері құрылысы аяқталмай қалған. Келтірілген шығынның жалпы сомасы — 2 млрд теңге.
Жымқырылған қаржыға Астанадан қымбат пәтерлер, Lamborghini Urus, Cadillac Escalade, Mercedes сынды қымбат көліктер және сирек тұқымды жылқылар сатып алынған. Сот шешімімен барлық мүлікке шектеу қойылды.
Ал екі күдіктіге қатысты бұлтартпау шарасы ретінде екі айға қамауға алу шешімі қабылданды. Тергеу әлі де жалғасып жатыр.