Өңірде ауа температурасы төмендеп, қар аралас жаңбыр жауып, көктайғақ қалыптасты. Осыған байланысты Шығыс Қазақстан облысының Полиция департаменті облыс тұрғындары мен қонақтарын ерекше сақ болуға шақырды.
— Көлік жүргізушілеріне автокөліктерін күзгі-қысқы маусымға алдын ала дайындау қажет. Яғни, шиналарының жағдайын, тежеуіш жүйесін және жарық құрылғыларын тексеріп алу керек. Жаңбыр, қар және көктайғақ кезінде қозғалыс жылдамдығын қатаң сақтап, аяқ асты маневр жасамау және қауіпсіз қашықтықты ұстану маңызды, — деп ескертті тәртіп сақшылары.
Жол бетінде мұздың алғашқы белгілері пайда болған кезде тежеу қашықтығы едәуір артады. Сондықтан жүргізушілерге ауа райына сай жүргізу мәнерін алдын ала бейімдеу қажет.
Жаяу жүргіншілерге де барынша сақ болған абзал. Жолды тек арнайы жаяу жүргіншілер өткелдері арқылы ғана кесіп өтіп, қозғалыс қауіпсіздігіне көз жеткізу және қараңғы уақытта жарық қайтарғыш элементтер тағу ұсынылады.
