Шығыс Қазақстан облысында тәртіп сақшылары көшелерді аралап, қоғамдық орындарда адамның бет-әлпетін жауып тұратын киімдерді киюге қатысты жаңа заң талаптарын түсіндіріп жатыр. Айта кетейік, бұл заң 12 шілдеден бастап күшіне енген.
Полицейлердің айтуынша, осы өзгерістегі басты мақсат — қоғамдық қауіпсіздікті нығайту және азаматтарды еркін тануға жағдай жасау. Бұл ретте адамның құқықтары мен бостандықтары, оның ішінде ар-ождан және діни сенім бостандығы да ескеріліп отыр.
Учаскелік инспекторлар түсіндіріп өткендей, тыйым адамның жүзін толық жауып, оның кім анықтауға кедергі келтіретін киімдерге қатысты. Мәселен, маска мен никаб киюге болмайды. Ал жүзді жаппайтын бас киімдер — хиджаб, шейла, химар, аль-амира және басқа да ұқсас элементтер бұл шектеуге жатпайды.
Сонымен қатар адамның бет-жүзін жабуға ауа райы жағдайы, медициналық қажеттілік, қызметтік міндеттерді орындау немесе мәдени және спорттық іс-шараларға қатысу сынды объективті себептер болған жағдайда, бұл тыйым қолданылмайды.
