Жыл басынан бері Шығыс Қазақстан облысының тәртіп сақшылары ел аумағында болу және еңбек қызметін жүзеге асыру ережелерін бұзған 350-ден астам шетелдікті анықтады. Олардың ішінде 55 адамға қатысты сот шешімімен Қазақстан Республикасына 5 жыл мерзімге кіруге тыйым салынып, елден шығару шарасы қолданылды.
Полицейлер шетелдік азаматтардың тіркеу мекенжайларын, сондай-ақ қабылдаушы тараптың хабарламаларының болуын тексеру бойынша арнайы рейдтерді жалғастырып жатыр.
— Соның нәтижесінде аудандардың бірінде уәкілетті органның рұқсатынсыз жұмыс істеген 36 шетелдік анықталды. Барлық заңбұзушыларға қатысты шара қабылданып, олар елден шығарылды. Ал жұмыс берушіге шетелдік жұмыс күшін заңсыз тартқаны үшін 200 АЕК көлемінде айыппұл салынды, — деп хабарлады ШҚО ПД баспасөз қызметінен.