ШҚО-да жыл басынан бері 3 мыңнан астам отбасылық-тұрмыстық зорлық-зомбылық фактісі тіркелді

Шығыс Қазақстан облысында тұрмыстық зорлық-зомбылыққа барғандарға жаңа жаза қолданыла бастады. Сот шешімімен олар өз үйлерінен уақытша шығарылып жатыр.
2025 жылдың басынан бері өңір бойынша осындай жазаға 4 ер адам тартылды.
— Заңға енгізілген өзгерістерге сәйкес, енді ерлі-зайыптылар бірнеше рет татуласа алмайды. Егер құқық бұзушылық қайталанса, учаскелік полиция инспекторының өтініші бойынша сот агрессорды үйден шығару туралы шешім шығара алады, — деп хабарлады ШҚО Полиция департаментінің жергілікті полиция қызметі басқармасына қарасты отбасылық-тұрмыстық зорлық-зомбылықпен күрес бөлімінен.
Өскемендегі дағдарыс орталығынан бұл тәжірибенің оң нәтиже көрсетіп жатқанын мәлім етті.
— Бұрын зорлық-зомбылық құрбандары өздері үйден кетіп, туыстарының немесе таныстарының үйін паналап жүретін. Біздің орталыққа да келетін. Енді заң өзгерді. Осылайша, әйелдер бала-шағасымен сенделіп жүрмейтін болды, — дейді орталық мамандары.
Бұл шара бір жыл ішінде қайталанған құқық бұзушылықтар кезінде қолданылады. Сотқа өтінішті учаскелік инспектор жолдайды.
Жалпы, жыл басынан бері облыста 3 144 отбасылық-тұрмыстық зорлық-зомбылық фактісі тіркелген. Бұл өткен жылмен салыстырғанда 10%-ға аз.