ШҚО бойынша ҚАЖ департаменті баспасөз қызметінің мәліметінше, пробация қызметінің есебіне қойылған ер адамға аға инспектор Аделя Ринатова жауапты болған. Ол азаматқа жан-жақты қолдау көрсетіп, қаладағы наубайханалардың біріне жұмысқа орналасуға көмектескен.
– Әуелі жүк тиеуші болып жұмыс істеп, қалаға нан тасымалдап жүрген азаматтың бұрынғы әйелімен қарым-қатынасы да жақсара бастады. Алайда біраздан кейін бәрі теріс кетті. Жұмыс пен отбасының орнына ол «закладка» іздей бастады. Пробациялық бақылау шарттарын бұзып, түрлі жерлерге тығылған есірткілерді іздеуге көшкен, — делінген ақпаратта.
Тәртіп бұзушылықтар электронды бақылау жүйесінің күнделікті мониторингінің арқасында анықталды. Оның аяғына тағылған білезік рұқсат етілген аймақтан шығып кеткенін бірнеше рет тіркеген. Сонымен қатар азамат пробация қызметіне міндетті тіркелуге келуді тоқтатқан.
– Ол білезікті өз бетінше шешуге әрекеттенген. Білезіктің белдіктерін әдейі күйдіріп, еріп кетеді деп үміттенген. Бірақ бұл сәтте де GPS-сенсор жұмыс істеп тұрып, оның қала бойынша барлық қозғалысын дәл тіркеп отырған. Көптеген бұзушылығы үшін өскемендіктің жазасы бас бостандығынан айырумен ауыстырылды. Ер адам 1 жыл 7 ай мерзімге қауіпсіздігі барынша жоғары колонияға қамауға алынды, — делінген хабарламада.