2025 жылдың қаңтар-мамыр айлары аралығында бұрын қылмыс жасаған 8,1 мың адам ұсталды. Бұл көрсеткіш өткен жылдың сәйкес кезеңімен салыстырғанда 5,3%-ға төмен. Олардың ішінде 2,5 мың адамның соттылығы алынбаған не өтелмеген болып шықты. Бұл көрсеткіш те бір жылда 20,6%-ға азайған.
Атап айтқанда, 932 адам бас бостандығынан айырылмайтын жазаға тартылды, 715 адам пробация қызметінің есебінде тұрды, 17 адам әкімшілік қадағалауда болды, ал 43 адам шартты түрде осындай бақылауға іліккен.
Өңірлерге бөлер болсақ, қылмысқа қайта барған азаматтар ең көп тіркелген қала — Астана. Мұнда бұрын да қылмыс жасаған 923 адам анықталған (былтырғыдан 24,2%-ға аз). Екінші орында — Алматы (864 адам, 11,5%-ға азайды), үшінші орында — Шығыс Қазақстан облысы (551 адам, 5,5%-ға азайды). Ең аз қайталама қылмыстар тіркелген өңірлер: Ұлытау облысы — 98 адам, Атырау облысы — 184 адам, Алматы облысы — 228 адам.
Қайталанған құқықбұзушылықтардың ең жиі кездесетін түрі — ұрлық. Бұрын сотталған 2,5 мың адам дәл осы қылмыс үшін қайта ұсталған. Бұл бір жыл бұрынғы кезеңмен салыстырғанда 19,9%-ға аз. Бірақ бұл көрсеткіш барлық қайталанған қылмыстардың 30,6%-ын құрап отыр (өткен жылы — 36,2%).