Бүгін Өскемен қаласындағы хайуанаттар бағы өз жұмысын бастағанына 25 жыл толуын атап өтті. Мерейтой құрметіне орай келушілер үшін нағыз мерекелік бағдарлама ұйымдастырылды.
16 жасқа дейінгі балалар үшін кіру тегін болды. Шаһар тұрғындары мен қонақтарын түрлі байқаулар мен викториналар күтіп тұрды.
— Бүгін балаларға арналған ерекше фотозоналар әзірленді. Сонымен қатар үй жануарларынан құралған арнайы көрме ұйымдастырылды. Бұл көрме кішкентай қонақтарға ерекше ұнағаны сөзсіз, — деп хабарлады Сол жағалау музей-қорығының әкімшілігінен.
Келушілердің көптігіне қарамастан, жануарлар өздеріне ұсынылған тәттілерді қуана қабылдады. Мерекенің басты кейіпкерлері зообақта дүниеге келген үш аю қонжығы болды. Олар суға шомылып, ойнап, келушілерден тәтті сұрап, көтеріңкі көңіл күйде күйде болды.
— Біз балаларымызбен бұл жерге жиі келеміз. Соңғы жылдары хайуанаттар бағы айтарлықтай өзгерді. Кең ашық вольерлер мен жаңа бақылау алаңдары пайда болды. Ал бүгінгі мерекеде балалар ерекше қуанып, жақсы әсер алды, — дейді қала тұрғыны Гаухар Онабаева.