Өскемен қаласының тұрғындары Славский атындағы жағалау көшесіндегі үйлер шамдарының жанбай тұрғанына шағымданды. Кешкі уақытта демалушылар көп жиналатын аумақ қараңғылыққа батқан.
Жарық шамдары Ауған соғысы ардагерлеріне арналған ескерткіш пен Даңқ мемориалы аралығында сөніп тұр. Бұл шаһар тұрғындарының наразылығын туғызды.
Қалалық ТҮКШ бөлімінің мәліметінше, бұған себеп — электр беру желісіндегі ақау.
— Славский жағалауы бойындағы көше жарығына тексеріс жүргізілді. Өзен вокзалынан Ауған соғысы ардагерлеріне арналған ескерткішке дейінгі аралықта жарық қалыпты жұмыс істеп тұр. Ал «Стрелкадан» бастап ескерткішке дейінгі бөлікте жарық ішінара өшіп қалған. Қазір ақауды анықтап, қалпына келтіру жұмыстары жүргізілуде. Жөндеу аяқталғаннан кейін жарық толық қалпына келтіріледі, — деп хабарлады бөлімнен.