Өткен жылы елдегі үй шаруашылықтарының жеке гигиена тауарларына жұмсалған шығындары жылына орта есеппен бір отбасына 80,8 мың теңгені құрады. Бұл бұдан бір жыл бұрынғыға қарағанда 7,8%-ға артық.
Жеке гигиена тауарларына көбінесе Маңғыстау облысының тұрғындары шығындалды. Олар жылына бір үйге 111,1 мың теңге кетірді, бұл бір жыл бұрынғыдан 12,9%-ға немесе ел бойынша орташа көрсеткіштен 37,6%-ға артық. Аталмыш шығындар бойынша екінші және үшінші орындарда Атырау облысы (үй шаруашылығына 107,7 мың теңге, жылдағы өсім 4,1%) және Шымкент (102 мың теңге, өсім 12%) орналасқан.
Шығыс Қазақстан облысының тұрғындары жеке гигиена тауарларына ең аз ақша жұмсайды — бір отбасына орта есеппен 57,3 мың теңге. Бұл бір жыл бұрынғыға қарағанда 3%-ға көп және орташа статистикалық қазақстандық отбасыға қарағанда 29,1%-ға аз. Сондай-ақ Абай (57,3 мың теңге) және Батыс Қазақстан (60,9 мың теңге) облыстарының тұрғындары гигиеналық заттарға аз ақша құртады
Баға сегментінде тұрақты және айтарлықтай өсім байқалады деп күтіліп отыр. Осы жылдың мамыр айының қорытындысы бойынша жеке гигиена тауарларының бағасы жылдық мәнде 6%-ға өсті. Оның ішінде, дәретхана сабыны — 10%, тіс пастасы — 8,6%, балалар сабыны — 8,2%, көбік және қырыну гелі — 6,8%, дәретхана қағазы — 6,1%, сусабын — 4,6% қымбаттады.
Өңірлер бөлінісінде бағаның ең жоғары жылдық өсімі Қызылорда (12,1%-ға), Шығыс Қазақстан (10,8%-ға) және Ақмола (9,4%-ға) облыстарында байқалды. Ең аз өсім Павлодар (1,6%-ға), Алматы (2,4%-ға) және Ұлытау (3,3%-ға) облыстарында тіркелді.
