Өскемен қаласында «Халық қатысатын бюджет» бағдарламасы аясында аулаларды абаттандыру жұмыстары жалғасуда.
Қала әкімдігінің мәліметінше, биыл жоба аясында кешенді абаттандырумен қатар жекелеген нысандар орнатылады деп көзделіп отыр.
— Кешенді абаттандыру жұмыстары аясында аулаларда негіз дайындау, тротуарлар салу, балалар және спорт алаңдарын, ересектерге арналған демалыс орындарын салу жұмыстары жүргізілуде, — дейді қалалық тұрғын үй-коммуналдық шаруашылығы, жолаушы көлігі және автомобиль жолдары бөлімі басшысының орынбасары Рашид Шерубаев. — 16 ауланы абаттандыруға, 16 балалар және 9 спорт алаңын орнатуға қаржы бөлінді. Сондай-ақ 8 футбол және 1 баскетбол алаңының құрылысы жоспарланған. Жұмыстардың алдын ала аяқталу мерзімі — биылғы жылдың қараша айының соңы.
Бөлім мамандарының нақтылауынша, қазіргі таңда қала бойынша 30 учаскеде тиісті жұмыс жүргізілуде.