Өскемен қаласында суға батып бара жатқан 5 жасар баланы құтқарған студент Төтенше жағдайлар министрлігінің медалімен марапатталды.
Оқиға 13 мамыр күні Үлбі өзенінде болған. Суға батып бара жатқан баланы студент Ерасыл Омарханов құтқарып қалған.
Бала әпкесімен өзен жағасында серуендеп жүрген кезде, суға құлап кеткен. Сол маңнан өтіп бара жатқан Ерасыл абдырап қалмай, дереу көмекке ұмтылған.
Осы ерлігі үшін Қазақстан-Американдық еркін университетінің 2-курс студенті ҚР ТЖ министрінің бұйрығымен «Суға батқандарды құтқары үшін» медалімен марапатталды.
— Министрдің атынан Ерасылға көрсеткен ерлігі үшін алғыс айтамыз. Біздің өңірде өскелең ұрпақтың лайықты үлгі алатын осындай батыры барына қуаныштымын!, — деді ведомстволық марапатты табыстаған ШҚО ТЖД бастығы Рашид Блялов.
